ՍՕՍԻ ՄԻՇՈՅԵԱՆ-ՏԱՊՊԱՂԵԱՆ
Ա.
Դուն որ ծնար ծնունդ տալով՝
օրհնեալ առեղծուած ես:
Դուն որ ծնար աշխարհ գալով՝
բարի եկար հազար բարով:
Բ.
Անցեալ տարի՝ կնքամայր
անցեալ ամիս՝ մօրաքոյր
այսօր ահա՝ հօրաքոյր…
Այսպէս շարունակ եւ
կեցած տեղս
պաշտօնս հետզհետէ բարձրացում կը կրէ:
Գ.
– Աղջիկ մըն ալ դուն բեր,
ըսին զիս տեսնողները.
տարոսիկներուն հետ
մաղթանք բաժնեցին ուրիշները.
– Հապա՞ եթէ տղայ գայ…
– Պէտք է փորձես որ գիտնաս,
խրատեցին շատերը.
Ծեր կին մըն ալ մօտեցաւ
ու ականջիս փսփսաց.
– Երկու տղա՞յ,
աղջիկ չունի՞ս դուն…
– Չէ,- ըսի տեսակ մը շուարած.
– Ուրեմն, զաւակ չունիս դուն…
Ես չուզեցի հաւատալ, սակայն
ծեր կինը կեանքի փորձառութիւն ունէր…
Դ.
Մամա ըլլալ
ու զգալ համը աշխարհ գալուն,
ցաւը երկունքին,
համը ցաւին.
ցաւ, որ միայն քեզի է շնորհուած.
ցաւերուն մէջ միակը, որ մարդ սրտբաց կ’ընդունի…
ցանկալի ցաւ, երբ
կը քաղցրանաս,
կը վերանորոգուիս,
կը տոգորուիս,
կը շէնանաս,
կ’անմեղանաս.
ու՝
ցաւի ահաւորութենէն ետք, երբ
երկինքն ու երկիրը
իրարու կը միահիւսուին՝
ի վերջոյ կը լսես
քնքոյշ ճիչը:
Ե.
Մանուկը ծնաւ
– Աչքերնիդ լոյս
– Մամային կը նմանի:
– Ճիշդ պապան է, քա:
– Չէ հա, մեծ մաման է:
– Մեծ հօր քիթէն ինկեր է:
Իսկ դուն լուռ՝
գլխով հաւանութեան նշան կ’ընես,
բոլորին ալ խաթըրին կը նայիս,
մէյ մըն ալ էականին կը նայիս,
ու՝ ամուր-ամուր կը գրկես նորածինդ:
Զ.
Մանուկը ծնաւ չծնաւ
պատուաստեցին զինք.
Խոզուկի պատուաստ,
Ջրծաղիկի,
MMR,
HIB
FLU…
– Սիրելի՛ բժիշկ,
պատուաստ ալ չկա՞յ
պինդ մնալու
չընկրկելու,
տոկալու ու
համբերութեամբ մաքարելու…
– Կեանքը շատ դաժան է բժի՛շկ, պատուաստէ՛:
Է.
Մանուկը ի՞նչ կ’ուզէ.
Հաւատք
Յոյս
Սէր
եւ Մկրտութիւն:
Ու թաթխեցին հա թաթխեցին
մկրտեցին մանուկը.
կատարեցին անոր վերջին իղձը՝
մտածելով որ մնացածը ինքնիրեն կու գայ:
Ը.
Ու մայրը անհամբեր է
թէ ե՞րբ լեզու պիտ’ ելլէ
իր առջինեկը,
թէ ե՞րբ առաջին բառը՝
«Մամա» պիտ’ արտասանէ.
բայց եկուր տես որ
ամէն անգամ որ
մաման
«մա-մա», ըսէ
մանկիկը անվարան
«պա-պա»
կը կրկնէ անոր ետեւէն:
Թ.
Մօր կաթը
արդար
սննդարար
կենարար
էութիւն
լիարժէք
առողջութիւն
մտորում
ապրում
յոյզեր
յոյսեր
հիացում
դիեցում
յագեցում
աճում
յորդում:
Մօր կաթը՝
անքակտելի կապ:
Ժ.
Մանուկին ճիչը
դիւթիչ դուրեկան
շէնշող հոգեթով
քնքոյշ ու մեղմիկ:
Մանուկին ճիչէն
անպակաս մնաք:
ԺԱ.
Ակռահատիկ շինեցէք,
ցնծացէք, ուրախացէք.
իր առաջին ակռայով
մանուկն արդէն մարդ դարձաւ:
Օ՛ն, ուրեմն ժամանակն է
գուշակութեան.
դե՜հ, դրէք իրերն իր դիմաց
Թող ընտրէ ան ապագան:
Արտատպումի պարագային կը խնդրուի նախապէս կապ հաստատել Հայերէն Blog-ի վարչութեան հետ:
Հիանալի է, Աստուած օրնհէ նորածին հայուհիները եւ ծնողները նաեւ կնքամարը, մօրաքոյրը, հօրաքոյրը…բոլոր ընտանեկան պարագայները:
LikeLike
Շնորհակալութիւն Սիլվի:
LikeLike
Շնորհաւոր ըլլայ, բոլոր հայ օճախները մանկանց ճիչերով լեցուին, բախտաւոր բալիկ ըլլայ:
LikeLike
Շնորհակալութիւն:
LikeLike
Ays inch lav kradzes Sosi; ughagi hoyagab. Kricht anmar hokis, aghchig mn al tun per jan ☺
Hazar shnorhavor Nanori dzenunte. Hayrov Mayrov medzna yv ella aroghch u yerchanig 😙😘😚
LikeLike
Մերսի շատ Միրէյ: ❤
LikeLike