«ԵՍ ԱՅՆ ՕՐԸ ՓՈԽՈՒԵՑԱՅ»

37600665_955666711281995_3442905652022738944_n.jpg

ԾՈՎԻԿ ԿԱՐԱՊԵՏԵԱՆ

Գիշերները տղոցս հետ սովորութիւն դարձուցած էինք, անկողինին մէջ երկար-երկար զրուցել: Երբ փոքր էին, պատմութիւններ կը յօրինէի ու տհաճ ձայնովս կ’երգէի. սովորութիւնը պահած էինք, ձեւը փոխելով:

Մեր երեքին հաճելի խաղ մը կը խաղայինք. իրարու յայտնել մէկզմէկու  լաւ ու գէշ յատկութիւնները:

Խաղը դաստիարակչական էր․ եսէն անջատուիլ ու մտածել տալ այլ անձերու մասին, սորվիլ ուրիշներու սխալներէն ու բարիքներէն․ այս ձեւով անոնք իրենց ազատ կարծիքը արտայայտելու ալ կը վարժուէին:

Կարգը եկած էր իմ գէշ սովորութիւններս ջուրի երես հանելուն:

Տղաս, որ այն ատեն տասը տարեկան էր, ըսաւ․

– Մամ, դուն միշտ տխուր ես ու ջղային:

Տղուս խօսքը զիս ցնցող հարուած եղաւ:

Կեանքիս մոխրագոյն օրերն էին, վերջ գտած էին հեքիաթները, չէին ուշացած լեղի իրականութիւնները, սկսած էին սիրածներուս կորուստները, տերեւաթափի նման, ու կը կարծէի, որ արցունքիս ու ցաւերուս վկաները միայն բարձս ու մեծ մօրս՝ քնացած ատենս ափիս մէջ ամուր սեղմուող խաչն էին:

Ժողովուրդի ու շրջանակի մէջ ինքզինքս զուարթ ու աշխոյժ ձեւացնելով՝ մոռցած էի ամենակարեւորները՝ զաւակներս:

Մանուկները կը սնանին, կ’աճին իրենց մօր զգացումներով։ Մայրը երբ ուրախ է, տնեցիները առողջ հոգեվիճակ կ’ունենան, իսկ երբ մայրը տխուր է՝ տնեցիները դժբախտ կ’ըլլան:

Ճիշդ այդ օրը ես փոխուեցայ:

Վիշտի սահմաններս սեղմեցի, նեղցուցի ու թաղեցի մէջս, շատ խորունկ, մէջս ու վրան զարդարեցի ծաղիկներով, հաշտուեցայ կսկիծիս հետ։ Հետագային սկսայ սիրել զինք ու դարձանք վաղեմի բարեկամներ, սորվեցայ զինք դիմաւորել ժպիտով, չէ՞ որ մենք անբաժան ենք կեանքի իրականութեան մէջ:

Այն օրէն ետք, տխրութիւնս երբեք չմօտեցաւ զաւակներուս, ան պահուըտած մնաց դէմքիս դառն ժպիտներուն մէջ:

 

Արտատպումի պարագային կը խնդրուի նախապէս կապ հաստատել Հայերէն Blog-ի վարչութեան հետ:

 

 

 

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s