ՏԷՆ ՊԻԼԶԷՐԵԱՆ

40330286_314053069362520_6689402561268547584_n.jpg

ՍՏԵՓԱՆ ՔԷՕՇԿԷՐԵԱՆ

Աշխարհի վրայ կան
Ամէն տեսակ մարդիկ
Փառք Աստուծոյ
Ու մենք որ մաքուր
Շատ մաքուր
Շատ շատ մաքուր ազգ մըն ենք
Այս մաքրամաքուր աշխարհիս մաքուր երեսին
Մաքրագոյն ազգն ենք կարծեմ
Գերմաքուր
Անդրամաքուր
Տունով-տեղով
Տակով-վրայով
Պետութեամբ
Եկեղեցիով
Սփիւռքով
Եթէ չեմ․․․ սխալիր
Չէ թուրքերն ալ կան դեռ
Դժուար է ասել
Ասել չըլնի
Լաւ ինչ որ է չերկարենք
Մեր մէջ ալ կան եղեր
Փոքերագէտներ
Փորնաստղեր ու զինասէրներ
Քանքարաւոր
Եւ․․․ ականջնիդ լաւ բացէք
Ունեւոր
Գիտէք ինչ ըսել է ասիկա
Ինչ ունենալու մասին է
Ուրեմն այսպիսի ունեւորներէն
Մէկն ալ հայ է
Եղեռնի յետնորդ սերունդ
Եւ Հայաստան գալ ուզած է տղան
Հայ ըլլալը գտեր գիւտեր է
Քաղաքացիութիւն ստանալ ուզած է
Կամ ալ դուք ուզած էք տալ
Տարբերութիւնը մեծ է
Քար տաշողը կարծեմ անանկ փափաք չունէր
Նորէն ալ չեմ գիտեր
Բայց եկեր է ի վերջոյ
Բարով գայ
Մենք հիւրասէր հիւրընկալ ժողովուրդ ենք
Բայց բերաննիս մինչեւ Հռոմ բացած ենք
Բարոյականի տէր ենք
Ասանկ բան չ’ըլլար
Դուք ազգին դրամը գրպանած ժամանակ
Բարոյականի մասին մտածեցի՞ք
Վաղն ալ Հայաստանի մէջ հարեմ պիտի բանայ
Արգիլուա՞ծ է
Դուք գաղտնի ունիք ձեր հարեմը
Անիկա բացայայտ
Ուրախ է իր հարեմով
Հարկաւ հպարտ նաեւ
Մէկ խօսքով
Ինչ որ դուք ու մենք գաղտնի կ’ընենք
Անիկա բացէ ի բաց կ’ընէ
Փոքեր կը խաղայ
Եւ հարեմ ունի
Մենք ալ կը խաղանք
Եւ մենք ալ ունինք

 

Արտատպումի պարագային կը խնդրուի նախապէս կապ հաստատել Հայերէն Blog-ի վարչութեան հետ:

Advertisements

ԳԻՇԵՐ

40247170_312875719476191_8285650993895440384_n

ՀԵՌՄԱՆ ՀԵՍՍԷ

Մոմս մարեցի։
Բաց պատուհանէն կը խուժէ գիշերն,
Կը գրկէ զիս մեղմ եւ կ’ընէ զիս իր
Եղբայրն ու ընկերն։

Երկուքս նոյն կարօտով հիւանդ ենք,
Կը ղրկենք երազներ կանխագուշակ
Եւ կը փսփսանք հին ժամանակէն
Մէջ հայրենատան։

Herrmann Hesse, Nacht (1907)
Գերմաներէնէ թարգմանեց՝
ԻՇԽԱՆ ՉԻՖԹՃԵԱՆ

 

Արտատպումի պարագային կը խնդրուի նախապէս կապ հաստատել Հայերէն Blog-ի վարչութեան հետ:

ՏԱՌԵՐՈՒ ՈՅԺԸ

40237850_524776651306025_426124518847676416_n.jpg

ԼԱՐԱ ԱՐԹԻՆ

Կուտակուած տառերու կամուրջն էի
Շարք շարքի կեցած ուղեցոյցի կը սպասէին…
Նժարին ոյժին տէրն էի:
Տառերը վար նետեցի
Դէպի անդունդ,
Մաքուր շունչով հեւացին:
Երկինք սփռեցի,
Օրհներգութեան յանկերգը գծեցին:
Դիւթակէզ մոխիր դարձան,
Ցրուեցան.
Հրակէզ օրօր շորոր անցան․
Սիրուեցան,
Կամուրջին հրայրքով խամրեցան:

 

Արտատպումի պարագային կը խնդրուի նախապէս կապ հաստատել Հայերէն Blog-ի վարչութեան հետ:

 

ՆՈՒԱՂՈՒՄ

40178309_323690194856996_4201510998072360960_n.jpg

ԼԵՌՆԱ ԳԱՐԱԳԻՒԹԻՒՔ

Գլխուն վերեւ լամբ մը կը շարժի
թելերու թրթռացումները
բանտուած են ապակիին մէջ.
ձայնապնակը իր ասեղին տակ
ջղագրգիռ կը ճզզայ:
Շանթահարիչ կայծեր
յանկարծ կը յարձակին
ջիղերուն վրայ… մասնիկներ փոշիացած
օդին մէջ կը թռին,
փարած նուագին լարերուն:

Բառեր ծուէն-ծուէն
կ’աղաղակեն. պոռչտուք.
ահն ու սարսափը
աղօտ լոյսին ներքեւ…
լամբ մը կ’երթեւեկէ,
գլխուն վերեւ, աջ ու ձախ:
Կը զնգան ձայներ ականջին
եւ դէպի ուղեղը օղակ-օղակ…
կը գալարուին:
Շառաչուն ապտակներ ալ
աջէն ու ձախէն.
կը մարին բիբերը
մինչե՜ւ… լուսածագ:

Սպիտակ պատեր՝ հարսնեւորներ
վարժ աչքերով կը դիտեն
հանդէսն այս արիւնազարդ:

Սիկարէթ մը շրթունքին փակած,
երկա՜ր շունչ մը,
ո՜հ, պահն է՝
ահա՛, կը շիջի լոյսը լամբին.
ե՛ւ ձայնը
ե՛ւ շունչը
կը նուաղին:

 

Արտատպումի պարագային կը խնդրուի նախապէս կապ հաստատել Հայերէն Blog-ի վարչութեան հետ: